ائلمئر باشقا فیل‌لردن فرقلی‌دیر، اونون دری‌سی‌نین رنگی باشقا فیل‌لرینین دری‌سی‌نین رنگینده دئییل‌دیر…
ائلمئرین دریسی رنگارنگ‌دیر: تیکمه ال ایشی کیمی!
ائلمئر، یازیچی دئوید ماکی‌نین «ائلمئر» آدلی سئری کتاب‌لارینین باش خاراکتئری‌دیر.
بیر گون، دئوید ماکی‌نین رنگلی‌دریلی قیزی یولدان کئچن عرق‌چی (نژادپرست) بیری طرفیندن آشاغی‌لانار. یازیچی بو حادثه‌دهن یولا چیخاراق، باشقا فیل‌لر کیمی دریسی بوز اولمایان، رنگارنگ دری‌لی «ائلمئر» آدلی بیر فیل خاراکتئری یارادار.
نه یازیق کی، هله ده دنیادا انسان‌لار، اؤزل‌لیک‌له ده اوشاق‌لار و یئنی‌یئتمه‌لر «فرقلی» (دری رنگی، دین، دیل، ائتنیک، جنسیت، علیل‌لیک (معلولیت) و باشقا) اولدوق‌لاری اوچون آیری-سئچکیلیک‌لره (تبعیض‌لره) و اذیت‌لره معروض قالیرلار.
دونیا ائلمئر گونو ده واردیر. مای آیی‌نین ۲۷-سی دونیا ائلمئر گونودور. ائلمئر گونونده اوشاق‌لار، هم اؤز فرقلیلیکلرینی منیمسه‌مگی (قبول ائتمگی) و اؤزلرینی باشقالاری ایله قارشیلاشدیرماماغی (مقایسه ائتمه‌مگی)، هم ده باشقالارینین فرقلیلیکلرینی منیمسه‌مگی و بو فرقلی‌لیک‌لره سایغی ایله یاناشماغی اؤیره‌نیرلر.