سیت بیارم ،سیت بیارم ،چارکی ده گوشت بره
بونیتو و شونه دوما تفنگ پس نقره
سیت بیارم سیت بیارم،باری گل باری حنا
حنایا سی دس و پاته ، گلیا سی سر جا
ژیره کوفتم ، ژیره بختم ، گرت ژیره وم نشس
شادوما د در دراوما ، سر تا پا گل وم نشس
ای انارون نشگنی تو ، مر ایما انار حریم
سوزکیونه زین کنیتو، ایما نیش عروس بریم
ای برارو ، ای خوورو، سر من قربونه تون
ای قدر خدا نکوشم سی حنا ونونه تون
پیلی بستم پیلی بستم چو چنار و شلتی انار
شادوما زیه و سرش سرکرده سیصد سوار
چی کنیم؟ چی نکنیمو؟ دس خوورمون ها برن
دور خیمه ش گل بکاریم جای دیری نبرن
عروس نگریو ایچه ده اوچه بیتره
ای هوسیره که تو داری، د شکر شیرین تره
*******
یخُونِه زِ داغِ دل هِی کوهِ زَردِه
زِ داغِ خانِ گَپُم دِلِس به دَردِه (ممدلی شیرعلیمردون)
خان اِیا زِ کِینو کوه ، چی گُلِ اَفتَو
هر کُجِه پا ایوَنِه گِریوِه بَرفَو( ممدلی شیرعلیمردون)
هفت و چار یَک ایگِرِن سی گِردِواری
تا وِریستِه شیرِ زردِ بختیاری( ممدلی شیرعلیمردون)
هفت و چار وا یَکدیه بَستِنِه پیمون
تا که واکِل بِکُنه شیرعلیمردون ( ممدلی خان مَند به تهرون )
اُردیِ دِشمِن ( وِی ) رَسی که یا به جَنگِس
بی مریم کِل ایزَنِه دَور تُفنگِس (ممدلی شیرعلیمردون)
اَشنیدُم که خانِ گَپُم رَهدِه زِ سَردَشت
دَورِ مَهنِه شَو گِرِهد به ایل نَوِرگَشت( ممدلی شیر علیمردون)
بی مریم کِل ایزَنه (برای فید نهایی)
اور شه بهون زی هم سر افتو
اسب خان زیدنه وا تیر برنو
تفنگ علیمردون هی ایکنه بنگ
تا زنو یک بگره چالنگ و هفلنگ